JISKA KAM USIKO SAJHE…..

Umr ke is chavaleesven (44th) padav me
Main fir se padh rahi hu
Na ramayan
Na gita
Na mahabharat
Na hi koi puran
Bas apne bachpan ki
ore thoda mud rahi hu
hanji..me bhi ‘C’ padh rahi hu
bas yun samjho
dheere dheere kisi
gehri khai ki taraf badh rahi hu
girungi nahi yeh bhi janti hu
kyunki kabhi jiski me teacher thi
wohi mera beta ab mera tutor hai,
mere liye to woh ek sharp shooter hai
jo har waqt
mere khali bheje pe
bandook leke khada rehta hai
aur is ‘C’ ka concept clear karne pe ada rehta hai
ab to buri tarah fansi hu
na nikal pati hu
na doob jati hu
aise dal dal me dhansi hu
janti hu isme se har hal me bahar ana hai
isliye hi to
apne dye kiye balon
ko fir se safed karne pa tuli hu
hmm..kanetkar ki book ka
kewal ek chapter padhne ke bad
jo aaj tak kisi ne shayad kiya hoga
woh karne chali hu
ji han…me apna
pehla ‘C’ Statement likhne baithi hu
maf karna Einsteinji..
aapke “E=mc­2 wale formulae
ka sahi matlab aaj hi jana hai
aur isiko apne first ever
‘C’ statement ke liye chuna hai
E=m*c*C ; (E=mc2)
{E=enigma
m=microbiology
c=chetna
C=’C’}
Jate jate ek secret aur bata du
Mere sare software doston ko
Tumhare is ‘C’, ‘C+, ‘C++ se
To mera ‘Genetics” jyada asan tha
In ‘C’ variables ko samjne se
DNA, RNA ko samjhna kaii guna saral tha
Tumhare ‘Compiler’ se
To majboot DNA ka phosphate bond tha.
Neways…………………..
ab to lag raha hai
ek kahavat apne liye bol dalu
aur is lambe hote kavya ka ant kar dalu
“jiska kam usiko sajhe
Aur kare to thenga baje.”

AB KE JAB MILO ISHWAR.....

Ab ke jab miloge ishwar
Tumse poochugi chand sawal,
Kyun hamein dee yeh nahni ankhen
Aur inme sapne sajaye vishal
Rahein kathin manzil de dee door
Aur chote chote diye paer..
yun jimmedariyon ka bhoj kya kam tha
Jo hath me kalam aur pakda dee
Dil pe saanso ka bhojh kya kam tha
Jo armano ki jhadi bhi laga dee
Hey bhagwn…ab to na dil behlta hai
Na hi iske arman niklte hai
Ankhein hai ki ab bhi har pal
Naye sapne sanjoti hai…
Bas hath hai jo kalam
Liye kuch panno pe chalte hai
Yunhi din rat ab dhalte hai
Shayad nazar nahi dale zameen per
Kai dino se hey data
Teri duniya me
Aajkal kaee log jeete nahi
Bas jivan ko yunhi chalte hain
Ab ke agar
Zameen per aao to
Poori tayyari ke sath ana
Aur nahi to
Mere sawalon ko bhed sake
Aise hathiyar jarur lana
Warna padega pachtana….
Warna padega pachtana…

tum aprichit

Aprichit the
Aprichit hi raho
Yun bar bar yadon me ake
Khud ko bevajha dohraya na karo…
Vihval vyakul man mera
Mrag-trishna sa bekal man mera
Badi yatan se shant hua hai
Isse fir se jwalamukhi mat banao
Badi jatan se sookhi hai mere ankh ki nadi
Use fir se bahne pe majboor na karo
Yeh katil hawa bhawander bane
Aur ujad de ghar mera
Isse pehle iska rukh mod liya karo
Kho kar tume pehle hi lut chuke hai
Apne aanso-on se sare sagar dubo chuke hai
Dil ki banajar zameen bhi na doob jaye kahin
Tum yadon ke yeh badal kahin aur barsaya karo……….

dadi tum sahi thi.

Yaad hai dadi
Bachpan me apne nakhun
Par safed chitte dikhakar
Maine tumse poocha tha…
“yeh kya hain aur kyun hain?”
Tab, tumne bade pyar se
Mujhe apne god me bitha kar
Aur mere nanhe komal hathon ko
Apne hathon me lekar kaha tha,
“ yeh sab tumhare dost hai…”
Tab hamari batein sun kar
Papa badi jor se hanse the
Aur ma ne to anayas hi pooch bhi liya
“dost kya nakhuno pe chitte ban kar ugte hai
Aur badhte nakhuno ke katne par kat-te hain?”
Aur tab tum vishwas se boli thi “han”…
Shayad tab ki kahi teri bat
hi sahi thi dadi…….
Kyunki mere nakhun per fir ek chitta
Katne ki or bada hai………
Kash… tum aaj bhi mere sath hoti..dadi
To yeh bhi bata deti….
“Inhe fir se kaise ugaya jata hai?”

pukar

teri yad ki har cheez ko
yun to hamne dubo diya
par na jane kaise ek beej
dil ki zameen mein bo diya
anjane me seenchte rahe use
apne aansoon-o se
vo nanha paudha
hamse ukhade na bana
ab to yeh hal hai ki
vishal ho chala uska tana
sun lo...................
us par ab tumari adaon ke fool khile hain
kuch fal bhi lagay hai
jo khud me teri yadon ke hazaro beej samete hai
aaj ek fal sukh kar
fir se dil ki zameen par gira hai
aur uska har beej
ped banne par ada hai
unki jadein mere bhitar
gehri aur gehri ho rahi
pal pal is dil ki zameen ko kured rahi
ab inhe jangal ban-ne se kaise roku??
apne bhitar mache
is dangal ko kaise jeetu??
kuch javab hai to
de jao.........
varna dil ke is hisse ko
aakar sath apne le jao.............

mujhe kehne do

tadpti kalam ka lava aaj behne do
machalte toofano ko aaj kagaj pe dhehne do
bahut chali andhiyan ret ki sehra me
marusthal yahan bhi kuch ban-ne do
mujhe kuch kehna hai kehne do

iske pehle ke sukh jaye yeh nadi
thoda door aur ise behne do
samundra ki kharash bhari jo armano me hai
use kuch to lafjhon me dhalne do
mujhe kuch kehna hai kehne do

sard syah ki kuch kalikh
kore panno pe failne do
oas ki boond bane mere ansoon ko
kuch der yunhi rehne do
mujhe kuch kehna hai kehne do...

sawal-javab aur zindagi

ek sawal bhi tum zindagi
ek javab bhi tum
aur isi sawal javab ke beech ji rahe hai hum
jab jeena chahte hai ji bhar ke
beech rah ruth ruth jane ka irada kyun hai
aur jab marna chahte hai
beman hum pe apna bhoj lada kyun hai
dukhon ko tune apna sathi,
aur maut ko apni saheli banaya kyun hai
tere dard ki jo dava bane
un lamhon ko bhulaya kyun hai
jiteji ai zindagi khud ko
chita pe sajaya kyun hai
javab tumhen ate hai mere har sawal ke
magar mujhse chupaya kyun hai
aaj fir se mujhe sawalon ke ghere me
aur khud ko javabon ke pehre me rakha kyun hai
tere in sawal aur javabon se thak chuke hai
fir bhi na jane kyun inhi ke beech ji rahe hai...
bas jiye ja rahe hai...
ek sawal bhi tum ek javab bhi tum
aur isi sawal javab ke beech ji rahe hai hum...