dadi tum sahi thi.

Yaad hai dadi
Bachpan me apne nakhun
Par safed chitte dikhakar
Maine tumse poocha tha…
“yeh kya hain aur kyun hain?”
Tab, tumne bade pyar se
Mujhe apne god me bitha kar
Aur mere nanhe komal hathon ko
Apne hathon me lekar kaha tha,
“ yeh sab tumhare dost hai…”
Tab hamari batein sun kar
Papa badi jor se hanse the
Aur ma ne to anayas hi pooch bhi liya
“dost kya nakhuno pe chitte ban kar ugte hai
Aur badhte nakhuno ke katne par kat-te hain?”
Aur tab tum vishwas se boli thi “han”…
Shayad tab ki kahi teri bat
hi sahi thi dadi…….
Kyunki mere nakhun per fir ek chitta
Katne ki or bada hai………
Kash… tum aaj bhi mere sath hoti..dadi
To yeh bhi bata deti….
“Inhe fir se kaise ugaya jata hai?”

pukar

teri yad ki har cheez ko
yun to hamne dubo diya
par na jane kaise ek beej
dil ki zameen mein bo diya
anjane me seenchte rahe use
apne aansoon-o se
vo nanha paudha
hamse ukhade na bana
ab to yeh hal hai ki
vishal ho chala uska tana
sun lo...................
us par ab tumari adaon ke fool khile hain
kuch fal bhi lagay hai
jo khud me teri yadon ke hazaro beej samete hai
aaj ek fal sukh kar
fir se dil ki zameen par gira hai
aur uska har beej
ped banne par ada hai
unki jadein mere bhitar
gehri aur gehri ho rahi
pal pal is dil ki zameen ko kured rahi
ab inhe jangal ban-ne se kaise roku??
apne bhitar mache
is dangal ko kaise jeetu??
kuch javab hai to
de jao.........
varna dil ke is hisse ko
aakar sath apne le jao.............

mujhe kehne do

tadpti kalam ka lava aaj behne do
machalte toofano ko aaj kagaj pe dhehne do
bahut chali andhiyan ret ki sehra me
marusthal yahan bhi kuch ban-ne do
mujhe kuch kehna hai kehne do

iske pehle ke sukh jaye yeh nadi
thoda door aur ise behne do
samundra ki kharash bhari jo armano me hai
use kuch to lafjhon me dhalne do
mujhe kuch kehna hai kehne do

sard syah ki kuch kalikh
kore panno pe failne do
oas ki boond bane mere ansoon ko
kuch der yunhi rehne do
mujhe kuch kehna hai kehne do...

sawal-javab aur zindagi

ek sawal bhi tum zindagi
ek javab bhi tum
aur isi sawal javab ke beech ji rahe hai hum
jab jeena chahte hai ji bhar ke
beech rah ruth ruth jane ka irada kyun hai
aur jab marna chahte hai
beman hum pe apna bhoj lada kyun hai
dukhon ko tune apna sathi,
aur maut ko apni saheli banaya kyun hai
tere dard ki jo dava bane
un lamhon ko bhulaya kyun hai
jiteji ai zindagi khud ko
chita pe sajaya kyun hai
javab tumhen ate hai mere har sawal ke
magar mujhse chupaya kyun hai
aaj fir se mujhe sawalon ke ghere me
aur khud ko javabon ke pehre me rakha kyun hai
tere in sawal aur javabon se thak chuke hai
fir bhi na jane kyun inhi ke beech ji rahe hai...
bas jiye ja rahe hai...
ek sawal bhi tum ek javab bhi tum
aur isi sawal javab ke beech ji rahe hai hum...

kal...aaj...kal

bandhi kyun itihas se
bhavishya ki dor hai,
takatvar insaan ka
aaj kyun kamjor hai..
kal ki khushi me
kal bejar tha..
aaj bhi bekrar hai...
insan ki zindagi se yeh kaisi takrar hai...
bejan jismon ka mela yeh jahan
li khushiyon ne kabrstano me panah
gam ke parvat..ashkon ki nadiyan
na jane jivan chala kis oar hai...
bandhi kyun itihas se...
bhavishya ki dor hai....

aah aur aag

vishwas

AB HAAR SE KOI SHIKWA NAHI MUJHKO,
KYUNKI HAR HAAR MERI
MUJHE JEET KA VISHWAS DILATI HAI.

AB BHAY NAHI LAGTA ANDHERON SE MUJHKO
KYUNKI YEH ANDHERE RAT KE
MUJHE SUBAH HONE KA VISHWAS DILATE HAI

AB NA GHUMAN HOTA HAIGUMNAM RAHON PE MUJHKO
KYUNKI GUMNAM RAHEIN YEH,
MUJHE MERI MANZIL PANE KA VISHWAS DILATI HAI

AB HAAR SE KOI SHIKWA NAHI MUJHKO
KYUNKI HAR HAAR MERI,
MUJHE JEET KA VISHWAS DILATI HAI....